Elgoibarko Udala
Ayto. de Elgoibar

Elgoibarko Izarra - Bigarren etapa

45 urteko ibilbidea ibilbide luzea da, eta, ondorioz, gorabeherak ere izan dira ELGOIBARKO IZARRAn.
1990ean desagertzear egon zen Elkartea. Elkarteak sortutako proiektuak bakoitzak bere autonomia hartu zuen eta Elkartea “hutsik” geratu zen, seme-alabek etxetik alde egiten dutenean gurasoak geratu ohi diren moduan. Bakarrik. Eta bazkide batzuek Elgoibarko Izarraren ibilbidea amaitu zela esan bazuten ere,  garai hobeen esperantzan elkartea bizirik mantendu behar zela erabaki zuten hiru-lau bazkidek. Une honetan hasiko da Elkartearen bigarren etapa.

Bigarren etapako proiektuak:

Eta ELGOIBARKO IZARRAren lehen etapa emankorra izan bazen, bigarrena ere ez da makala izan. Ikus ditzagun proiektuok:

Elgoibartarron arteko komunikazioa eta harremanak sendotzeko helburuarekin, 1992ko abenduaren 24an elgoiBARREN astekaria argitaratu genuen. Elgoibarko berrien kronista izateko espirituarekin jaio zen BARREN eta era txukunean lortu dugulakoan gaude. Hasi modu apalean hasi ginen, baina hamaika urtean zehar aldaketa ugari izan ditugu, denak ere BARREN hobetzeko nahiarekin.

Hasieratik garbi ikusi genuen aisialdia euskalduntzea garrantzitsua zela herriko neska-mutilen euskalduntze prozesuan. Hala, 1995ean Atxutximaika aisialdi taldea aurkeztu genuen. Taldearen helburua Elgoibarko umeak, jolasa eta euskara soka berean lotzea da; hirurak nahasian jartzea, bat eginda; umeek euskaraz jolastea, euskaraz ondo pasatzea, lagun berriak euskaraz egitea, euskaraz gizarteratzea, azken finean. Atxutxiamaikak txikienekin lan egiten du, 3 eta 11 urte bitartekoekin, hain zuzen ere, eta 30 begirale inguru izaten dira urtero umeekin lanena jarduten dutenak.

Eta Atxutxiamaikak txikienekin jarduten badu, GAZ-T taldea 12 eta 16 urte bitarteko gaztetxoekin lan egiteko antolatutako aisialdiko gazte taldea da. Adin tarte hau erabakigarria da gaztetxoen hizkuntza portaerei erreparatzen badiegu. Izan ere, asko eta asko adin honetan hasten dira gaztelaniaz berba egiten, euskara laga eta gaztelaniaz hitz egiten. Badakizue, oraindik ere oso zabaldu dago euskara umeen kontua dela. GAZ-T taldearen helburua gaztetxoak euskaraz gizarteratzea da. 2007ko abenduan aisialdi talde hau bertan behera geratu zen.

GUREAN BAI-ELKARTEAK: Normalizaziorako proiektua edo hitzarmena dugu Gurean Bai. 1996an martxan jarri genuen proiektu hau herriko elkarte eta erakundeentzat prestatu genuen eta auto-konpromisoan oinarrituta zegoen. 51 elkarte eta erakundek sinatu zuten hitzarmena. Elkarte eta erakundeetan euskararen erabilera bultzatzea zen hitzarmenaren muina, ezagutza eta motibazioa ere landu ditugun arren. Esan bezala, proiektua 1996an jarri genuen martxan eta 2003an itxi zituen ateak. Zortzi urtean lan ona eta emankorra egin dugun sentsazioarekin itxi ere.

GUREAN BAI-MERKATARITZA: Gurean Bai hitzarmenak hiru atal ditu, eta merkataritza da bigarrena. 2003ko urtarrilean aurkeztu genuen Gurean Bai-Merkataritza hitzarmena. 135 dendarik hartu zuten konpromisoa beraien dendetan euskararen erabilera indartzeko. Egun, Ostalaritzako sektorean ere garatzen da egitasmo hau.

  Ia 50 urteko historia dauka helduen euskalduntze-alfabetatzeak Elgoibarren. 1956an ekin zion eta harrezkero ez du geldiunerik izan (makal uneak izan badira ere). Arigera proiektuaren helburua euskalgintzako sektore hau bistaratzea izan da, hautsa kendu eta egiten ari denari balorea ematea. Proiektua 2000ko urtarrilean aurkeztu zen eta hiru urtean jardun genuen lanean aurretik aipatu ditugun helburuak betetzeko. ARIGERA proiektuan lau erakundek hartu dugu parte: AEK euskaltegiak, Udal Euskaltegiak, Udaleko Euskara Batzordeak eta Elgoibarko Izarra Kultur Elkarteak.

Elgoibarko Izarrak bigarren etapan jarri duen proiekturik handiena izan da Toletxe kafe antzokia. Baina gauzak ez dira beti nahi edo desio bezala irteten, eta, arrazoiak arrazoi, Toletxek ateak itxi zituen zabaldu eta bi-hiru urtera

 KULTUR jarduerak: Aurretik esan bezala, Elkartearen helburuetako bat euskal kultura herritarren artean zabaltzea da. Beraz, bai lehen etapan eta baita bigarrenean ere, kultur jarduerak antolatzen darraigu.

NAZIO mailakoak: Elgoibarko Izarraren lan eremua Elgoibar bada ere, gure nahia Euskal Herri euskalduna ezagutzea da. Beraz, euskararen aldeko nazio mailako ekimenetan ere gure esku dagoena eskaintzen ahalegintzen gara.

Esan beharra dago proiektu hauek guztiak Udaleko Euskara Batzordearen laguntzarekin eta babesarekin jarri ditugula martxan. Horretarako urtero-urtero kolaboraziorako hitzarmen bat sinatzen dugu bi erakundeok. Gainera, proiektu batzuetan Udalak ere parte hartzen du eragile moduan. Aurrerago esan dugun moduan, euskalgintzak guztion beharra dauka, bai herri mugimenduarena eta baita administrazioarena ere, udalarena kasu honetan.

KUADRILLATEGI:

Proiektu hau 2006-07 ikasturtean jarri zen martxan estreinakoz Elgoibarko Udalaren laguntzarekin. Baina, urte batzuk daramatza martxan Euskal Herriko hainbat udalerritan. Egitasmoaren helburua, gazte koadriletan euskararen erabilera suspertzea da. Erdaraz egiteko ohitura duten lagunarteek euskaraz egiteko ohitura finkatzea, hizkuntzazko ohituraren aldaketa emanez.

12 – 14 urte bitarteko gazte koadrilei ematen zaie aukera egitasmoan parte hartzeko. Eta astean 2 ordutan eskaintzen zaien aisialdiaren truke, elkarrekin euskara hutsez hitz egin beharko dute egitasmoko orduetan. 2 ordutako aisialdi eskaintza finko horrez gain, ekintza bereziak ere antolatzen dira. Hala nola, ikastaroak, asteburuko irteerak, tailerrak, etab.
 

KIRIBILKA:

Herriko txikienentzat zuzendutako aisialdi egistasmoa. Ekimenaren saioak ostiral arratsaldetan burutzen dira; normalean Foruen Plazan. Hala ere, ekintza bereziak ere antolatzen dira Kiribilka egitasmoaren barruan.

ELGOIBARREN.NET:
Elgoibarko orainkaria izateko espirituarekin jaio zen 2006ko urriaren 23an www.elgoibarren.net.

EUSKARA ERREFORTZUAK:

Euskaraz berba egiteko edo komunikatzeko zailtasunak dauzkaten ume eta gaztetxoentzat bereziki prestatutako programa da Euskara errefortzuak. Izenak dioen moduan, ikastetxean jasotzen dutenaren errefortzua izan nahi du programa honek, beti ere ume eta gaztetxoek euskaraz hitz egiteko erraztasuna lortzeko helburuarekin. Programa honetan Elgoibarren eta Elgoibartik kanpo jaiotakoek parte hartu dezakete.

ETORRI BERRIAK:

Gazte etorkinekin lan egiteko programa espezifikoa da Etorri berriak. Programaren helburua kanpotik datozen etorkinei gurean integartzeko laguntza eskaintzea da. Besteak beste, gure herriko kultura, historia, ohiturak eta antzerakoak lantzen ditugu. Eta, gainera, gure herrian dauden zerbitzu eta baliabideak aurkezteaz  gain, hauetan integratzeko ahalegina ere lantzen dugu programa honetan. 

Elgoibarko Izarra
(itzuli)